Upcoming Tours
Call Us: +27 21 863 6400

Karoo Kruie Karakters en Kos

  • Sutherland - Suid-Afrika se sterre-kyk hoofstad
  • Kuier by Kruie Kraai Koning se Antoinette Pienaar en Oom Johannes
  • Prins Albert, die juweel van die Karoo
  • Rooiberg Lodge
  • Ons ry amper heelpad grondpad!

Overview

By Live the Journey dink ons ALTYD aan die 3 M’e: “Moments, Mates, Memories”! Met al ons toere probeer ons “MOMENTS” skep saam met ander toer-“MATES”, om sodoende “MEMORIES” te bou, wat almal hopelik lank sal bybly . Ons poog om unieke ervarings, gebeurtenisse en karakters uit te snuffel en verpak dit dan in unieke toere. Hierdie toere kan jy nie op jou eie doen nie. Dit is presies die rede hoekom jy saam met Live the Journey moet toer en op hierdie volgepakte 7-dag Karoo-ervaring moet gaan! Moenie hierdie een misloop nie!

Sutherland, hier kom ons!! Ja, jy lees reg – ons toer begin in die sterrekyk hoofstad van die land.

Antoinette Pienaar en oom Johannes, maak julle reg, ons is op pad!! Ja, weereens lees jy reg. Na Sutherland gaan ons vir 2-dae by Kruie Kraai Koning se Antoinette Pienaar en Oom Johannes kuier. Legendariese karakters die 2, wat jou gaan vul met hope nuwe “moments and memories”.

Prins Albert ons ry jou nie mis nie!! As jy nog nie daar was nie, kom gerus saam en ervaar self hoekom ons die juweel van die Karoo besoek.

Rooiberg Lodge ons eindig by jou!! In die rustigheid van die Karoo sluit ons ʼn buitengewone ervaring af.

Daar is nog baie juweeltjies in die program ingebou, maar seker die lekkerste is dat die roete so ontwerp is dat ons omtrent heelpad net grondpad ry.

Itinerary

DAG 1: VERTREK NA SUTHERLAND

09:00 Groeplede ontmoet mekaar in die Paarl omgewing. Vandaar ry ons via die Nuwekloof- en Mitchell’s passe na Ceres. Vanaf Ceres ry ons via Op die Berg en die Katbakkiespas tot by die Tankwa padstal. Die padstal is ideaal vir ʼn vinnige middagete versnapering. Daarna steek ons die provinsiale grens vanaf die Wes-Kaap na die Noord-Kaap oor met die Oubergpas wat op ons wag op pad na Sutherland.

Die Oubergpas is 'n gewilde grondpad pas en is ongetwyfeld die indrukwekkendste grondpad pas in die Noord-Kaap. Tydens die rit styg die hoogte 820-meter oor ‘n afstand van 10,4 km om 'n stywe gemiddelde gradiënt van 1:13 te lewer. Die steilste gradiënt is 1: 6 - wat steil is! Dit loop oor die rug van die Roggeveldberge en bereik 'n hoogtepunt van 1402 m op die boonste Karoo-plato. Die pas het 44 hoeke en draaie, wat 8 haarnaald draaie insluit en 4 hoeke skerper as 90 grade.

Vanaf die plato is dit ongeveer 40 km voor Sutherland bereik word.

Ons bespreek in by ons akkommodasie en geniet ʼn vroeë aandete.

19:30 Ons ontvang ʼn privaat sterrekyk toer van ʼn plaaslike inwoner. Tydens hierdie 90-minute toer kyk ons deur teleskope en leer meer van die wonders van die naghemel.

O/N Sutherland (aandete)

DAG 2: VIA MERWEVILLE NA ANTOINETTE EN OOM JOHANNES

Na ontbyt val ons in die pad na Merweville.

Nog ‘n skouspelagtige pas wag vandag op ons roete. Rammelkoppas, is tussen Sutherland en Merweville. Hierdie baie steil pas sal vir lank onthou word nadat jy dit gery het. Dit klim 263 meter in hoogte binne 2, 6 km en lewer 'n gemiddelde gradiënt van 1:10 met die steilste gedeeltes 1: 5. Alhoewel 'n 4x4 in droë toestande nie verpligtend is nie, kan dit 'n lewensredder wees in nat weer. Die pas bied skouspelagtige uitsigte met steil afdraandes en kranse van tot 300-meter hoog.

Ons stop by Christo Bothma. Die man het ‘n ongelooflike verplant-kwekery. Dit is nie oop vir die publiek nie. Ons groep kry spesiale vergunning vir die besoek. Ons gaan genoeg tyd hê om in te neem wat Christo hier doen. Sy passie is aansteeklik.

Die plan is om ‘n worsie te braai by Christo op die plaas voor ons verder in die pad val.

Ons mik vir Theefontein waar Antoinette Pienaar vir ons wag. In Antoinette se eie woorde: “Dis wonderlik dat julle vir my en Oom Johannes hier op Theefontein wil kom kuier. Die pad hierheen is nie met duwweltjies besaai nie, maar die tweespoor paadtjie se middelmannetjie kan somtyds effe hoog wees. Kom met ‘n bakkie of SUV, en ry versigtig. Moenie laat kom nie, want julle moet nog genoeg tyd hê sodat Moeder Natuur haar towerspel oor almal kan spreek en ons ingestel kan word op Manberg en Vrouberg. Maak tyd om die labarint te stap en kry jou balans. Of sit op die groot stoep en kyk die vlaktes in en word stil”.

Aandete gaan een heerlike geselligheid wees met almal wat sal moet handjie bysit om die kos op die tafel te kry. Live the Journey voorsien al die bestandele vir die etes op Theefontein, maar dit sal ‘n groep poing moet wees met die voorbereiding en gaarmaak. Antoinette verwys na die proses as ‘n “saam maak ete”.

O/N Theefontein (ontbyt, aandete)

DAG 3: WERKSWINKEL MET ANTOINETTE EN OOM JOHANNES

Antoinette: “Tyd loop stadig hier op Theefontein. Ek moet ook Oom Johannes se ouderdom in gedagte hou – hy is al in sy 90’s! Ons wil egter vroeg veld toe gaan om kruie te identifiseer. Na die kruie wys, braai ons ‘n worsie in die veld en keer dan terug waar mense dan bietjie kan rus. Ons stap egter nie ver nie, so moenie worry nie. In die middag doen ons ‘n inligtingsessie en werkswinkel oor die kruie wat ons gesien het. Elkeen moet asb ‘n boekie saambring om notas te maak. Ons praat oor die algemeen oor kruie en hulle medisinale waarde. Elkeen, of die wat wil, kry kans om te praat oor hulle skete en vrae te vra!” Mense, dit gaan fantasties wees! Egte mense, egte ervaring – die Engelse woorde is “real, authentic experience”. Ons gaan nie die tyd saam met Antoinette en Oom Johannes sommer vergeet nie.

Vandag se ontbyt en aandete gaan albei die vorm van ‘n “saam maak” etes aan neem.

O/N Theefontein (ontbyt, ʼn worsie in die veld, aandete)

DAG 4: VIA AGTERPAAIE NA PRINS ALBERT

Geniet ontbyt en kuier vir oulaas saam met Antoinette-hulle. Ons vertrek en ry met agterpaaie op pad na Prins Albert. Daar waar min mense kom is plekke mos die mooiste. Om die rede probeer ons altyd op agterpaaie bly. Ons roete vir die dag word egter bepaal deur padtoestande en weersomstandighede.

Wie het al die lekkerte beleef om in die veld ‘n worsie te braai en net te ontspan? Dit is presies wat ons vir middagete beplan. ‘n Lekker braai in die veld of as omstandighede dit toelaat in ‘n droë rivierloop. Dit gaan op ‘n baie besondere plek wees … die plaas waar die eerste goud in die Prins Albert omgewing ontdek is in 1871. Die eerste stukkie goud is deur ‘n aardvark uitgegrawe op die plaas Spreeuwfontein.

Laat middag arriveer ons in Prins Albert en bespreek in by ons akkommodasie waar almal kan ontspan en die mooi van die omgewing in neem. Prins Albert is 'n mooi, geskiedkundige dorpie in die Groot Karoo en lê aan die voet van die ontsagwekkende Swartbergpas. Die dorp bied wye oop ruimtes om te stap, helder lug, ‘n ster-gevulde hemelruim en stilte om jou siel te verkwik.

Vanaand geniet ons aandete by die Showroom waarna die fliekvlooie kan uitsien na ‘n lekker rolprent. Die Showroom is waarskynlik die heel mooiste Art Deco teater in Suid-Afrika.

O/N Karoo View, Prins Albert (ontbyt, aandete)

DAG 5: PRINS ALBERT EN DIE SWARTBERGPAS

Geniet die saligheid van vroegoggend koffie in jou kamer. Ons ontmoet mekaar dan vir brunch (eie rekening) in die dorp. Daarna ry ons tot op die kruin van die Swartbergpas.

Die Swartbergpas is vir baie Suid-Afrikaners die rubicon van grondpad-passe. Daar is 'n mistiek rondom hierdie ou pas, wat dit verhef tot heel bo aan die lys van bergpasse in die land. Die pas het ook nasionale monument status. Dit was Thomas Bain se laaste en beste stuk padbou werk.

Op die kruin geniet ons die asemrowende uitsit oor die Klein Karoo waarna ons terugdraai na Prins Albert. Geniet ‘n rustige middag en verken die juweeltjies van Prins Albert in jou eie tyd.

O/N Karoo View, Prins Albert (aandete)

DAG 6: PRINS ALBERT NA ROOIBERG LODGE

Ons verlaat Prins Albert en ry via die skouspelagtige Meiringspoort na De Rust. Hier is ‘n bietjie vrye tyd om die dorp op jou eie te verken of dalk brunch te geniet en die atmosfeer van die dorp te geniet. De Rust lê in die krom van 'n draai in die pad tussen die volstruisveerhoofstad en die Plooi-berge van Meiringspoort.

Vanaf De Rust volg ons steeds agterpaaie na Calitzdorp en dan ry ons met die Rooibergpas tot by ons oornag stop.

Die Rooibergpas is in 1928 gebou. Dit verbind Calitzdorp met die klein dorpie Van Wyksdorp. Daar is 'n totaal van 69 draaie en hoeke, wat 6 haarnaald draaie insluit en baie ander draaie met 'n draairadius van meer as 90 grade. Die pad bied 'n wonderlike uitsig van die valleie en rante wat in fynbos bedek is, en in die winter is die helder oranje blomme van honderde aalwyne te sien.

O/N Rooiberg Lodge (ontbyt en aandete)

DAG 7: VERTREK HUISWAARTS

Ons laaste toer dag het aangebreek. Na onbyt vertrek ons vanaf Rooiberg Lodge en ry na Van Wyksdorp. Die Van Wyksdorp Mall is ‘n besoek werd. Diegene wat wil huiswaarts keer vanaf hier is welkom. Toerlede wat nog ‘n laaste pas wil inpas kan ons toerleier volg en die Gysmanshoekpas ry. Gysmanshoekpas is 'n bergpas oor die Langeberge.

Tot met die opening van die Garciapas in 1879 was die Gysmanshoekpas die enigste pad in die omgewing van Riversdal oor die Langeberge na die Klein Karoo. Die trekboere was vasberade om 'n oorgang oor die Langeberge te kry en in ongeveer 1740 is die Plattekoofpas begin gebruik. Gou het dit die hoofroete tussen die Klein Karoo en die kusgebied geword. Op 'n kaart van Burchell uit 1772 word die pas reeds aangedui. Die pas is in 1841 en weer in 1860 verbeter en is daarna na die magistraat van Oudtshoorn, J. Hudson, vernoem. In 1841 is die pas herbou en effens verlê. Dit is 'n baie steil pas en loop oor 'n nek bo-op die Kanetberg, suid van die plaas Brandrivier. Ook vanaf die Karoo-kant is die opdraand lank en steil. By die ingang van die pas is die bouval van 'n tolhuis.

So kom ‘n Karoo kuier dan tot ‘n einde. Ons neem afskeid en elkeen ry dan in eie tyd huis-toe.

EINDE VAN DIENSTE

Dates

20 Oktober 2022 - 26 Oktober 2022

Rates

TOERPRYS:
Per persoon wat deel - selfry toer opsie: R 14 900.00

Daar is beperkte plek in die toerleier se voertuig vir passasiers:
Per persoon wat deel - saamry toer opsie: R16 850.00 per persoon

Included

Ingesluit:

  • Toerleier in eie voertuig
  • 1 x nag in Sutherland op DBB basis
  • 2 x nagte op Theefontein in oop plan koshuis-tipe styl akkommodasie
  • 2 x ontbyte op Theefontein (groep help met voorbereiding van etes)
  • 2 x aandetes op Theefontein (groep help met voorbereiding van etes)
  • 2 x nagte in Prins Albert 
  • 2 x aandetes in Prins Albert
  • 1x braai in die veld
  • 1 x nag by Rooiberg Lodge op DBB basis
  • Privaat sterrekyk-toer
  • Toegang tot die vetplant kwekery by Merweville
  • Fliek-vertoning by die Showroom in Prins Albert

Excluded

Uitgesluit:

  • Vervoer (4x4 of SUV met hoë grondvry hoogte)
  • Brandstof
  • Etes wat nie gespesifieer word nie
  • Drinkgoed
  • Reisversekering en voertuig versekering
  • Persoonlike uitgawes

Notas:

  • Daar kan slegs 14 persone op die toer geakkommodeer word.
  • Die toer begin in die Paarl en eindig in die Kaap.

Reservations

Fill out the form below to request a full itinerary.